英超周六凌晨獨腳戲，水晶宮主場迎戰曼城。水晶宮功勳主帥格拉斯拿今夏離隊，雖然基本班底冇變，但新領隊沙治仲未摸熟隊波，首輪吞愛華頓兩蛋，今場好大機會再輸；曼城首仗反勝般尼茅夫，球隊漸入佳境，而且佢哋近5次聯賽交手4勝1和、食住對手，今場客勝有計。文:邪神

（Now 621周六凌晨3時直播）

曼城上場憑卓基兩個助攻，臨尾連入兩球反勝般尼茅夫2比1，雖然整體表現略嫌不足，但總算3分已袋，並為新帥馬利斯卡打開勝利之門，而且「剷青」亮相嘅挪威鋒霸艾寧夏蘭特未「開齋」，連同社區盾佢連續兩場交白卷，今仗肯定更搶韁，至於新加盟嘅艾利洛安達臣經過聯賽同社區盾，已經開始適應，預期今場會有進步演出。

桑馬迪達扭計士氣曳
至於水晶宮，聯賽首輪作客0比2不敵愛華頓，表現遠遜預期，其實佢哋基本人腳同上季捧歐協聯冠軍時無甚分別，但格拉斯拿離隊影響確實好大，新帥沙治同球隊磨合需時，最重要係佢仲未建立威信去駕馭球員前，球隊已經出事。

該隊上季歐協聯決賽入球功臣桑馬迪達，早前同球隊出現合約糾紛，鬧到上國際足協，呢位法國世盃國腳離隊態度堅決，不但嚴重打擊士氣，而且水晶宮未有因此將佢雪藏，上場對愛華頓繼續派佢上陣，又點會有好結果？喺咁惡劣嘅情況下迎戰來勢洶洶嘅曼城，想唔輸都難。