周日清晨上演世盃第2場16強大戰，由巴拉圭硬撼法國合演「矛盾對決」。「高盧雄雞」擁有強勁進攻火力，加上近8場7次半場領先，勝率高達88%，即使巴拉圭今屆以防守行先，相信亦難以招架，半場客勝絕對值得入手。（Now 616及618周日清晨5時直播）文:路西法

一向擅守嘅巴拉圭雖然成功躋身16強，但今屆世盃表現其實麻麻，對上4場法定時間僅錄得1勝2和1負，分組賽對住實力分子美國更加大敗1比4。直至目前為止，巴拉圭成隊只係入得3球咁大把，前鋒祖利奥安斯素貢獻1個入球及2次助攻，因此法國今場只要嘜實佢，相信巴拉圭進攻都冇咩板斧。

巴拉圭上場32強雖憑互射12碼，爆冷淘汰4屆冠軍德國，不過該仗長時間捱打，畀德國攻門21次，贏波主要原因同對手發揮奇差有關。何況巴拉圭剛剛激戰120分鐘，一班球員體能消耗極大，踢完上場到今場開波都只係抖得4日咁少，未必回到氣，隨時會大敗一場。

入波手段多元化
相反，法國被視為奪冠大熱，呢支勁旅今屆4戰全勝狂轟13球，每場至少贏2球起跳。隊長基利安麥巴比獨取6球，同美斯競逐緊金靴獎，其餘兩名主力包括奧士文尼迪比利亦轟入4球，米高奧利斯更交出5次助攻，高踞助攻榜首位；咪忘記仲有後備翼鋒巴特利巴高拿，今屆世盃都有2球進帳。

法國一班前線球員狀態火熱，可謂點點開花，巴拉圭即使死守都恐怕難以守得住，加上睇完德國遭遇「滑鐵盧」，「高盧雄雞」今場一定唔敢掉以輕心，相信一開波就會搶攻，半場客勝值得大家捧場。