世盃32強，瑞士惡鬥阿爾及利亞，兩隊今屆大踢開放式足球，加上大家實力接近，任何一方都冇必要退縮刻意防守，甚至會豁出去先下手為強，力爭贏波晉級。尤其係阿爾及利亞上場分組賽戲劇性出線，士氣大振，無懼同對手駁火，參考阿爾及利亞各項賽事近4場總入球全開3球或以上，2.5球入球大值得再追。 （Now 618、616及馬會指定場外投注處周五早上11時直播）文:路西法

瑞士表現令人驚喜，3場分組賽取得2勝1和，合共轟入7球，包括以2比1擊敗主辦國之一嘅加拿大，以小組首名出線。20歲中場新星文森比演出光芒四射，近兩場入3球及交出1次助攻，腳風非常順。翼鋒魯賓華加斯亦連續兩場有波入，瑞士火力全開，今仗能攻破阿爾及利亞大門機會相當高。不過，瑞士防線欠穩，近3場都有失波，跨屆近4場世盃有3次總入球開3球或以上，今場未必可以保持清白之身。

瑞士今屆3戰都失波
至於非洲球隊阿爾及利亞上場分組賽，原本只需打和奧地利就可以出線，但並冇「泊大巴」死守，反而極積同對方鬥攻，兩度落後之下，補時反超前3比2，最終打和3比3，過程峰迴路轉，充分反映阿爾及利亞擅攻不擅守，預料會延續有前冇後風格。事實上，阿爾及利亞中前場不乏進攻猛將，前曼城翼鋒馬列斯上仗梅開二度，前鋒高爾尼今季為馬賽射入11球，中場亦有表現出色嘅年輕小將伊巴謙馬薩做串連工作，有力撕破瑞士防線，加上阿爾及利亞近3場失7球，今場入球大屬於首選。