意大利盃決賽，拉素主場迎戰國際米蘭，雙方剛於上場聯賽同一地點交鋒，國際米蘭大勝3比0，短時間內再遇呢支手下敗將，相信仍然可以佔上風。睇番兩隊近5次碰頭，國際米蘭全部上半場領先，隨時又先發制人，直取半場客勝。

（周四凌晨3時開賽）文:Mic少

國際米蘭已經提早奪得意甲冠軍，只要今場贏波，就可以成為「雙冠王」，爭標鬥心一定強。事實上，國米季尾愈戰愈勇，各項賽事近7仗取得6勝1和，包括近3仗上半場都領先。隊長兼首席射手拿達路馬天尼斯5月初傷愈復出後，迅速重拾狀態，近2場入1球及2次助攻，包括上仗對拉素，開賽6分鐘就入波，跟住妙傳彼達蘇錫射入世界波，協助國米上半場領先2球。另1位國米前鋒馬古斯杜林腳風亦非常順，近7次上陣有6球進帳及3次助攻，相信呢對鋒線「夢幻組合」可以再次迅速攻陷拉素防線。

拉素低迷頂唔住強攻
另邊廂，拉素表現持續低沉，各項賽事近7場贏得2場，同埋意大利盃4強兩回合法定時間都同阿特蘭大打和，靠互射12碼勝出晉級決賽，表現欠缺說服力。鋒線主力薩卡尼近期受傷患困擾，固然削弱攻力，防守亦唔穩陣，早前聯賽主場被烏甸尼斯攻入3球，對護級球隊克雷莫納，開賽29分鐘就失守。拉素近3場合共失7球，並且都係上半場落後，恐怕今仗抵擋唔住國米強攻。